Бұл туралы вице-премьер 3 қараша күні өткен Үкімет отырысында айтты. Жаңа құжатты әзірлеу жұмыстарына Президент Әкімшілігі, Стратегиялық жоспарлау және реформалар агенттігі, сондай-ақ Қазақстанның стратегиялық зерттеулер институты (ҚСЗИ) жұмылдырылады.
Айта кетейік, Қазақстанда 2015 жылы бекітілген Мемлекеттік қызметшілердің әдеп кодексі әлі де қолданыста. Онда шенеуніктердің адалдығы, әділдігі, ашықтығы мен сыпайылығына баса назар аударылған. Атап айтқанда, қызмет бабын жеке мүддеге пайдалануға, азаматтармен дөрекі сөйлесуге және заңсыз қаржылық немесе мүліктік пайда көздеуге қатаң тыйым салынған.
Енді билік ауқымды мемлекеттік басқару реформасы аясында жаңа әдеп қағидаларын енгізуді көздеп отыр. Еске салайық, бұған дейін Қасым-Жомарт Тоқаев мемлекеттік қызметшілерге қойылатын жаңа талаптарды әзірлеуді тапсырып, олардың Конституцияны басшылыққа алып, Отанға адал қызмет етуі тиіс екенін қадап айтқан болатын. Сондай-ақ Президент реформаларды тек көзбояушылық үшін жасауға жол бермеуге қатаң ескертті.
