Қазақстанда балаларды интернеттегі қауіп-қатерден қорғауға арналған заң жобасын дайындау кезінде жасанды интеллект қолданылды. Бұл туралы Құрылтай төрағасының орынбасары Динара Закиева Үкімет сағатында мәлімдеді.
«Балалардың цифрлық және ақпараттық қауіпсіздігі туралы» заң жобасын әзірлеу үшін AI-Quryltai платформасы пайдаланылған. Ондағы арнайы жасанды интеллект моделі 800 мыңнан астам нормативтік құқықтық актіні қамтитын деректер қорымен жұмыс істейді.
Жасанды интеллект қолданыстағы заңдарды, азаматтардың өтініштерін, ата-аналар көтерген мәселелерді, интернеттегі қауіп-қатерлерді және шетелдік тәжірибені талдаған. Соның негізінде заңнамадағы олқылықтарды анықтап, қажетті өзгерістерді пысықтауға мүмкіндік туған.
Платформаның көмегімен 120-дан астам түзету әзірленген. Олардың қатарында барлық цифрлық платформаларда ата-ана бақылауын енгізу, онлайн ойындар мен мобильді қосымшаларды міндетті тексеруден өткізу, сондай-ақ балалардың тексерілмеген цифрлық өнімдерге қол жеткізуін шектеу ұсыныстары бар.
Бұдан бөлек, ойындар мен қосымшалардың мазмұны туралы ақпаратты арнайы белгілеу талаптарын енгізу көзделіп отыр. Егер цифрлық өнімнен балаларға қауіп төндіретін немесе заң талаптарын бұзатын жағдайлар анықталса, оған қолжетімділікті шектеу не бұғаттау тетіктері қарастырылған.
Дегенмен жасанды интеллект заң жобасын өз бетінше дайындап, шешім қабылдаған жоқ. Оның көмегімен әзірленген барлық ұсынысты депутаттар, заңгерлер және цифрлық қауіпсіздік саласының мамандары қайта қарап, толықтырған.
Қазір заң жобасы Үкіметтің қорытындысын алуға жолданып жатыр. Одан кейін құжат Құрылтайдағы жұмыс тобының қарауына ұсынылады.
Жалпы, Мемлекет басшысының тапсырмасымен қабылданған «Қазақстан балалары» тұжырымдамасы аясында депутаттар балалардың құқықтарын қорғауға бағытталған үш заң жобасын әзірлеген.










