Премьер-министр Олжас Бектенов Ұлттық экономика және Қаржы министрліктеріне ірі дәулет иелеріне салық салу мәселесін пысықтауды тапсырды. Бұл тапсырма Президент Жолдауын іске асыруға арналған Үкімет отырысында берілді.
Екі министрлік бір ай ішінде аса ауқатты азаматтарға салық салудың халықаралық тәжірибесін зерттеп, оны Қазақстанда қолдану мүмкіндігіне қатысты ұсыныстар әзірлеуі тиіс.
Атап айтқанда, ірі дәулет иелеріне жоғары салық мөлшерлемесін енгізу бастамасы қарастырылып жатыр. Алайда оның нақты көлемі мен қандай азаматтарға қолданылатыны әзірге белгісіз.
Сонымен қатар Олжас Бектенов Ұлттық экономика министрлігіне жаңа Салық кодексіне енгізілетін жекелеген түзетулер пакетін пысықтап, тиісті мемлекеттік органдармен келісуді тапсырды.
Әзірге ауқатты азаматтарға салынатын салықты арттыру жөнінде түпкілікті шешім қабылданған жоқ. Бұл мәселе ұсыныстар әзірлеу кезеңінде тұр.
