Қазақстан Үкіметі инвестициялық саясатты қайта қарап, кәсіпкерлерді қолдаудың жаңа тетіктерін енгізуді жоспарлап отыр. Олардың қатарында шағын бизнеске тексеру жүргізуге үш жылдық мораторий енгізу және жеңілдетілген несие беру шаралары бар.
Бұл туралы Үкімет отырысында Премьер-министрдің орынбасары – ұлттық экономика министрі Серік Жұманғарин мәлімдеді.
Министрдің айтуынша, елімізде инвестициялық жобаларды басқарудың бірыңғай жүйесін қалыптастыру көзделген. Ол үшін цифрлық басқару тетіктері енгізіліп, мемлекеттік органдар мен ұйымдардың бірін-бірі қайталайтын функциялары қысқартылады. Сондай-ақ инвестициялық жобаларды іске асыруға ортақ талаптар белгіленеді.
Бұдан бөлек, 2027 жылы Орта кәсіпкерлікті дамыту жоспарын бекіту жоспарланып отыр. Құжатта кәсіпорындарға ұзақ мерзімді жеңілдетілген қаржыландыру ұсыну және өндірісті технологиялық жаңғыртуға қолдау көрсету шаралары қарастырылған.
Үкімет микро және шағын кәсіпкерлік субъектілерін тексеруге үш жылдық мораторий енгізудің орындылығын да қарастырады. Бұл шара бақылау жүйесін қайта құрып, мемлекеттік реттеудің цифрлық үлгісіне көшуге мүмкіндік беруі тиіс.
Әзірге мораторий енгізу туралы түпкілікті шешім қабылданған жоқ. Оның қолданылу тәртібі мен нақты шарттары кейін белгілі болады.
