Қазақстанда 18 961 адам Абай есімін еншілеген. Бұл туралы 10 тамыз — Абай күніне орай Ұлттық статистика бюросы мәлім етті.
SHYNDYK.KZ редакциясының хабарлауынша, ұлы ақын әрі ойшылдың есімін иеленгендер көбірек шоғырланған өңірлердің көшін Астана қаласы бастап тұр — мұнда 2 186 адам бар. Одан кейінгі орындарда Түркістан облысы (2 008) мен Алматы қаласы (1 740) тұр.
Статистикадағы ең егде жастағы Абай 1932 жылы дүниеге келген. Дегенмен бұл есім көбіне 30 бен 34 жас аралығындағы қазақстандықтар арасында жиі кездеседі — бұл жастағылардың саны 3 267 адамды құрайды.
Абай есімі сәбилер арасында да әлі күнге дейін өз танымалдығын жоғалтқан жоқ. Тек 2026 жылдың бірінші жартыжылдығының өзінде 91 сәбиге осы есім берілген.
Сондай-ақ статистикада қызықты дерек те бар: елімізде Абай есімді тоғыз әйел тіркелген.
Бұдан бөлек, республикада әр түрлі жазылу үлгісін (Ибрагим және Ибраһим) есепке алғанда, бұл есімнің түпнұсқасын иеленген 37 844 адам тұрады.
Айта кету керек, ұлы ақынның мұрасы тек адам есімдерінде ғана емес, географиялық атауларда да көрініс тапқан. Бүгінде елімізде бір облыс, бір қала, үш аудан және 26 ауыл Абайдың есімімен аталады.
