Қазақстанның Орталық сайлау комиссиясы мәслихат депутаттығына кандидаттардың сайлауалды үгіт-насихатына жұмсалатын шығындардың мөлшерін белгіледі. Кезектен тыс сайлау 2026 жылғы 29 қарашаға жоспарланған.
Бөлінетін қаржы көлемі кандидаттың қай деңгейдегі мәслихатқа түсетініне байланысты. Астана, облыстар және республикалық маңызы бар қалалар мәслихаттарына үміткерлер үшін 700 мың теңгеге дейін, қалалық мәслихат кандидаттарына 650 мың теңге, ал аудандық мәслихатқа үміткерлерге 500 мың теңге қарастырылған.
Қаражаттың басым бөлігі бұқаралық ақпарат құралдарындағы үгіт-насихатқа бағытталады. Теледидар мен радиода сайлауалды бағдарламаны таныстыруға, сондай-ақ баспа немесе интернет басылымдарында екі материал жариялауға кандидаттың деңгейіне қарай 290 мыңнан 410 мың теңгеге дейін бөлінеді.
Сайлаушылармен кездесулер өткізуге және үгіт материалдарын дайындауға 130 мыңнан 180 мың теңгеге дейін қарастырылған. Ал көлік шығындарын өтеуге 80 мыңнан 110 мың теңгеге дейін қаржы бөлінеді.
Жоспар бойынша елдегі 228 мәслихатқа барлығы 3447 депутат сайлануы тиіс. Оның 668-і облыстық, 626-сы қалалық, ал 2153-і аудандық мәслихаттарға тиесілі.
Айта кетейік, көрсетілген қаражат кандидаттарға тікелей берілетін ақшалай сыйақы емес. Бұл — сайлауалды науқанға жұмсалатын және мемлекет есебінен өтелетін шығындардың белгіленген шекті мөлшері.
