Қазақстанда белгілі композитор, «Дос-Мұқасан» ансамблінің жетекшісі Мұрат Құсайыновты мемлекеттік марапатқа ұсыну бастамасы көтерілді. Петиция авторлары өнер иесінің қазақ музыкасының дамуына қосқан үлесі жоғары мемлекеттік деңгейде бағалануы тиіс деп есептейді.
Мұрат Құсайынов жарты ғасырдан астам уақыт бойы «Дос-Мұқасан» ансамблінің шығармашылық жолымен тығыз байланысты. Ұжым қазақтың халық әндерін заманауи эстрада, рок және поп музыка элементтерімен ұштастырып, ұлттық музыканың жаңа бағытта дамуына ықпал етті.
Петицияда 2027 жылы ансамбльдің құрылғанына 60 жыл толатыны атап өтілген. Осыған байланысты бастамашылар композитордың кандидатурасын мерейтой қарсаңында ресми түрде мемлекеттік наградаға ұсынуды сұрап отыр.
Өтініш авторларының мәліметінше, 2025 жылғы желтоқсанда Қазақстанның Мәдениет және ақпарат министрлігі Мұрат Құсайыновты марапаттауға қатысты ресми ұсыныс түспегенін хабарлаған.
Енді бастамашылар тиісті мемлекеттік органдарды бұл мәселеге назар аударуға шақыруда. Ал құрметті атақ беру туралы түпкілікті шешім заңнамада белгіленген тәртіппен қабылданады.
