Қазақстанда шетелдік азаматтардың мемлекеттік шекарадан өту тәртібі өзгереді. Жаңа талаптарға сәйкес, олар елге кіру үшін электронды рұқсат алуы керек. Бұл жүйе бірнеше кезеңмен іске қосылады, деп хабарлайды SHYNDYK.KZ.
Өзгерістер ең алдымен Ақтау халықаралық әуежайы мен төрт автокөлік өткізу бекетіне қатысты болып отыр. Нақтырақ айтқанда, Павлодар облысындағы «Үрлі төбе», Жамбыл облысындағы «Аухатты», Түркістан облысындағы «Атамекен» және Жетісу облысындағы «Нұрлы жол» бекеттерінде жаңа ереже 2026 жылдың 1 қарашасынан бастап қолданысқа енді.
2027 жылдың басынан бастап электронды рұқсат ресімдеу тәртібі Астана мен Алматы халықаралық әуежайларына да таралады. Ал 1 наурыздан бастап бұл талап Қазақстан шекарасындағы барлық өзге де өткізу бекеттерін қамтитын болады.
Әзірге шетелдіктің қолында электронды рұқсаттың болмауы оның елге кіруіне кедергі келтірмейді. 2027 жылдың 1 шілдесіне дейін өтпелі кезең қарастырылған. Бұл уақыт аралығында шекарашылар келушілерге жаңа талаптарды түсіндіріп, құжатты қалай алу керектігін нұсқайды.
Өтпелі кезең аяқталған соң бұл ережелерді сақтау қатаң талап етіледі: 2027 жылдың 1 шілдесінен бастап электронды рұқсаты жоқ шетелдіктерге Қазақстан аумағына кіруге тыйым салынады.
