Ішкі істер министрлігі биылғы қаңтар-қыркүйек айларындағы іздестіру жұмыстарының нәтижесін жариялады. Осы уақыт аралығында полиция қызметкерлері хабар-ошарсыз кеткен мыңдаған адамды тауып, қылмыс жасады деген күдікпен іздеуде жүрген азаматтарды ұстаған.
Ұсталғандардың арасында ірі көлемдегі алаяқтық істеріне қатысы бар деген күдіктілер де кездеседі. Мәселен, Қарағандыда 67 жастағы ер адам қолға түсті. Тергеу мәліметінше, ол 2018 жылы тауар сатуды сылтауратып, коммерциялық ұйымның қоймасынан құны 401 миллион теңгеден асатын өнімді алып кеткен.
Ал Алматыда 1,3 миллиард теңгеден астам қаржыға қатысты алаяқтық ісі бойынша іздеуде жүрген шетел азаматы ұсталды. Тергеу нұсқасына сәйкес, ол 2023 жылы Бішкекте Оңтүстік Кореядан косметикалық өнімдер жеткізіп беруге уәде етіп, жәбірленушінің ақшасын иемденген.
Бұдан бөлек, Қазақстан аумағында ТМД елдері мен өзге мемлекеттердің құқық қорғау органдары іздеу жариялаған 537 адам ұсталған.
ІІМ мәліметінше, тоғыз ай ішінде із-түзсіз жоғалған азаматтарды іздеу және қылмыстық істер бойынша күдіктілерді анықтау жұмыстары жалғасқан.
