4 қарашада ветеринария саласына қатысты заң жобасын Құрылтай депутаты Серік Егізбаев таныстырды.
Депутаттың айтуынша, саладағы өзекті мәселелердің бірі – білікті мамандардың тапшылығы. Әсіресе ауылдық жерлерде ветеринарлар жетіспейді. Мамандықтың тартымдылығы төмен болғандықтан, жұмыс істеп жүрген қызметкерлерге түсетін жүктеме артып, ветеринариялық іс-шараларды уақытылы жүргізу қиындап отыр.
Осы мәселені шешу үшін заң жобасында ветеринария мамандарына жыл сайынғы ақылы еңбек демалысы кезінде кемінде екі лауазымдық айлықақы мөлшерінде сауықтыру жәрдемақысын төлеу көзделген.
Сонымен қатар ғылыми дәрежесі бар мамандарға негізгі жұмыс орны бойынша ай сайын қосымша ақы төлеу ұсынылады:
-
73 525 теңге (17 АЕК) – ғылым кандидаттарына;
-
147 050 теңге (34 АЕК) – ғылым докторларына.
Бұл сомалар 2026 жылға арналған айлық есептік көрсеткіш негізінде есептелген.
Қаржылай қолдаудан бөлек, ветеринария мамандарын арнайы киіммен қамтамасыз ету жоспарланып отыр. Сондай-ақ сала қызметкерлерінің кәсіби мүдделерін қорғап, олардың біліктілігін арттыруға ықпал ететін ветеринариялық палата құру ұсынылды.
Заң жобасы әзірге бірінші оқылымда ғана мақұлданды. Ұсынылған төлемдер мен әлеуметтік кепілдіктер заң түпкілікті қабылданып, тиісті нормалар күшіне енгеннен кейін ғана қолданыла бастайды.
