Қазақстанда білім беру бағдарламалары еңбек нарығындағы өзгерістерге сай жаңартылып жатыр. 2026 жылы жаңа мамандықтар мен жұмыс берушілердің талаптары ескеріліп, 2 мыңға жуық бағдарлама қайта қаралған.
Бұл туралы Үкімет отырысында Ғылым және жоғары білім министрі Саясат Нұрбек мәлімдеді.
Министрдің айтуынша, 2026 жылы Жаңа мамандықтар атласы негізінде 1 983 білім беру бағдарламасы жаңартылған. Салыстырсақ, 2022 жылы бар болғаны 7 бағдарлама өзектендірілген.
Сонымен қатар еліміздің өңірлері бойынша 20 жаңа мамандықтар картасы әзірленген. Оларда 2 мыңнан астам жаңа мамандық айқындалып, қолданыстағы кәсіптердегі өзгерістер де қамтылған.
Жаңа бағыттардың қатарында цифрлық егіздерді әзірлеу және пайдалану, сондай-ақ өндірістік процестерде жасанды интеллектіні қолдану саласындағы мамандар бар.
Білім беру жүйесіндегі өзгерістер тек жаңа мамандықтарды енгізумен шектелмейді. Оқу бағдарламаларына микробіліктіліктер енгізіліп, өндірістік оқытуға да басымдық беріліп жатыр.
Бұл шаралар білім беру жүйесін технологиялық өзгерістерге бейімдеп, еңбек нарығында сұранысқа ие дағдылары бар мамандар даярлауға бағытталған.
