Бұл туралы Еңбек және халықты әлеуметтік қорғау министрі Асқарбек Ертаев Құрылтайдың жалпы отырысында мәлімдеді. Оның айтуынша, бұдан былай мемлекеттік көмекке мұқтаждықты анықтау үшін азаматтардың ресми табысын білу жеткіліксіз болады.
Жаңа тәртіп бойынша банктер жәрдемақы алушылар мен олардың отбасы мүшелерінің есепшоттары және депозиттері туралы мәліметтерді мемлекеттік органдарға ұсынады. Алайда бұл ақпарат азаматтардың келісімімен ғана беріледі.
Отбасының материалдық жағдайы сегіз бағыт бойынша бағаланады. Оған 50-ден астам өлшемшарт кіреді. Осылайша, әлеуметтік көмек тағайындағанда азаматтардың ресми табысымен қатар нақты шығыны мен жинаған қаражаты да назарға алынады.
Сондай-ақ мемлекеттік ақпараттық жүйелердегі деректерді күн сайын жаңарту жоспарланған. Ал әр отбасының әлеуметтік әл-ауқат санаты ай сайын қайта қаралады.
Жаңа жүйе 2027 жылғы 1 қаңтардан бастап қолданысқа енгізіледі. Оның мақсаты – мемлекеттік қолдауға шынымен мұқтаж отбасыларды дәлірек анықтау.
