Ведомствоның мәліметінше, қазірдің өзінде Электрондық еңбек биржасында жарияланған бос жұмыс орындарының жартысынан астамы жұмысшы мамандықтарға тиесілі. Алдағы жылдары мамандарға сұраныс өнеркәсіп, құрылыс, ауыл шаруашылығы және ақпараттық технологиялар салаларында жоғары болады.
Қажетті кадрларды даярлау үшін сұранысқа ие мамандықтар тізімін 51-ден 174-ке дейін кеңейту жоспарланып отыр. Оған инженерия, құрылыс, өңдеу өнеркәсібі және биотехнология салаларындағы жаңа бағыттар енгізіледі.
Жасыл және атом энергетикасына мамандар даярлауға да ерекше көңіл бөлінеді. Бұл салалар болашағы зор бағыттар ретінде қарастырылып отыр. Оларды дамыту үшін заманауи техникалық дағдыларды меңгерген қызметкерлер қажет.
Сонымен қатар цифрландыру мен жасанды интеллектіні енгізу жұмыс берушілердің талаптарын өзгертіп жатыр. Кейбір мамандықтар жойылуы немесе едәуір өзгеруі мүмкін. Оның орнына технология, автоматтандыру және деректерді талдауға байланысты жаңа кәсіптер пайда болады.
Осыған байланысты кадр даярлау жүйесі экономиканың ұзақ мерзімді қажеттіліктеріне бейімделмек. Түлектердің біліктілігі еңбек нарығындағы өзгерістерге сай болуы үшін білім беру бағдарламалары мен кәсіби стандарттарды жаңарту көзделген.
