Қазақстанның ішкі тауар айналымының көлемі бірінші жартыжылдықтың қорытындысы бойынша 15,3%-ға артып, 36,2 трлн теңгеге жетті. Бұл туралы Үкімет отырысында Сауда және интеграция министрі Арман Шаққалиев мәлімдеді, деп жазады SHYNDYK.KZ порталы.
«Сонымен қатар, ішкі нарықтың критикалық импортқа тәуелділігі төмендеп келеді. Оның үлесі 14,7%-ға дейін қысқарды, бұл отандық өнімге деген ішкі сұраныстың артқанын көрсетеді», – деп атап өтті министр.
Оның айтуынша, тауар айналымының өсуіне 30%-ға жуық өскен азық-түлік секторы негізгі үлес қосқан. Қаңтар-мамыр айларында азық-түлік экспорты 34,4%-ға артып, 1,6 млрд долларға жетті.
Шаққалиев сондай-ақ Қазақстан негізгі өнімдердің басым бөлігі бойынша ішкі сұранысты толық қамтамасыз етіп отырғандығын мәлімдеді.
«Күнбағыс майы, ұн, күріш, картоп, пияз, сәбіз, макарон өнімдері, сиыр және қой еті бойынша өзін-өзі қамтамасыз ету деңгейі 100%-дан асады», – деп хабарлады Сауда министрлігінің басшысы.
