Threads желісінде жарияланған жазба авторының айтуынша, марқұмның отбасы қайғылы оқиғаға қатысты түрлі болжамдар мен қауесеттерді таратпауды бірнеше рет сұраған. Алайда әлеуметтік желілерде нақты дәлелденбеген мәліметтер әлі де жарияланып жатыр.
Жазба авторы отбасының өтінішін елемей, жалған ақпарат таратуды жалғастырғандарға қатысты тиісті шара қолданылуы мүмкін екенін ескертті.
Ол марқұмның армандары туралы да айтып берді. Қыз киноға түсуді армандаған, өнерге қызығып, өзін түрлі шығармашылық бағытта дамытқысы келген.
Еске салайық, 6 қарашада Алматыдағы әл-Фараби атындағы Қазақ ұлттық университетінің студенттер қалашығында журналистика факультетінің бірінші курс студенті қаза тапты.
Аталған дерек бойынша қылмыстық іс қозғалды. Қыздың өліміне қатысты нақты мән-жайлар әзірге анықталған жоқ.
Марқұмның жақындары көпшілікті асығыс тұжырым жасамауға, тексерілмеген ақпарат таратпауға және қара жамылған отбасының қайғысына құрметпен қарауға шақырды.
