АҚШ-тың Флорида штатында 1 қарашада болған әуе апатынан 20 жастағы Наталия Гаделья Филгейрас қаза тапты. Ол Learjet 60 бизнес-джетінің екінші ұшқышы болған. Жастығына қарамастан, Наталия 1300 сағаттан астам ұшу тәжірибесін жинап үлгерген.
CNN Brasil басылымының марқұмның отбасына сілтеме жасап хабарлауынша, Наталия Флоридада Бразилиядан қоныс аударған отбасында дүниеге келген. Оның авиацияға деген қызығушылығы бала кезінен басталған. Әуесқой ұшқыш болған әкесі қызын кішкентайынан ұшақ басқаруға баулыған.
Наталия 12 жасында болашағын авиациямен байланыстыруға шешім қабылдаған. Ал 17 жасында жеке ұшқыш куәлігін алып, автомобиль жүргізуді үйренбей тұрып ұшақ басқаруды меңгерген.
«Адамдар маған: “Сен тіпті көлік жүргізе алмайсың ғой” дейді. Ал мен оларға: “Есесіне ұшақ басқара аламын” деп жауап беремін», – деген еді Наталия 2023 жылы америкалық CBS12 телеарнасына берген сұхбатында.
Ол American Flyers авиация мектебін тәмамдап, кәсіби даярлығын жалғастырған. Өгей әкесі Тиаго Кортелетидің айтуынша, Наталия 20 жасқа толғанша 1300 сағаттан астам ұшқан.
2025 жылдың наурызында жас ұшқыш өзі оқыған West Boca Raton мектебіне арнайы барып, оқушылармен кездескен. Ол авиация саласындағы тәжірибесімен бөлісіп, жасөспірімдерді армандарына жетуге жігерлендірген.
Наталияның басты мақсаты ірі жолаушылар ұшағының ұшқышы атану еді. Соңғы тоғыз айда ол жеке авиация саласында жұмыс істеп, арманына біртіндеп жақындай түскен.
«Ол өте жақсы қыз еді. Жауапкершілігі жоғары, еңбекқор болатын», – деді анасы Камила Гаделья Кортелети CNN Brasil журналистеріне
Анасының айтуынша, Наталия ұшқан кезде сезінетін еркіндікті ерекше жақсы көрген. Ол өмірін аспансыз елестете алмаған
1 қарашада Наталия Learjet 60 бизнес-джетімен кезекті сапарына аттанған. Алайда бұл оның соңғы ұшуы болды. 20 жастағы ұшқыш қыз жолаушылар лайнерін басқару туралы арманын жүзеге асыра алмай, әуе апатында қаза тапты.
