Құрылтайда Қазақстанның БҰҰ-ның Халықтың қоныстануы саласындағы қорымен (ЮНФПА) ынтымақтастығы талқыланды. Кездесуде әйелдердің құқықтарын қорғау, зорлық-зомбылықтың алдын алу және гендерлік теңдікті нығайту мәселелеріне баса назар аударылды, деп хабарлайды SHYNDYK.KZ.
Құрылтай депутаты, Халықаралық істер, қорғаныс және қауіпсіздік комитетінің мүшесі Дана Медеуова ЮНФПА-ның Қазақстан, Қырғызстан және Түрікменстандағы өкілі Чинве Огбоннамен кездесті.
Тараптар демографиялық даму, репродуктивтік денсаулық және әйелдердің қоғамдық-саяси өмірге белсенді қатысуына жағдай жасау мәселелерін қарастырды. Сонымен қатар «Әйелдер, бейбітшілік және қауіпсіздік» күн тәртібін іске асыру, әйелдер мен балаларға қатысты зорлық-зомбылықтың алдын алу жолдары талқыланды.
Кездесуге Денсаулық сақтау вице-министрі Манас Рамазанов пен Қазақстандық қоғамдық даму институтының басқарма төрағасы Жұлдызай Ысқақова қатысты. Жұлдызай Ысқақова Президент жанындағы Әйелдер істері және отбасылық-демографиялық саясат жөніндегі ұлттық комиссия төрағасының орынбасары қызметін де атқарады.
Кездесу қорытындысында тараптар әйелдердің құқықтарын қорғауға және гендерлік теңдікті нығайтуға бағытталған заңнамалық жұмыстар аясындағы ынтымақтастықты жалғастыруға мүдделі екенін білдірді.
