Марапаттау рәсімі Түркияның Президент сарайында өтті. Жоғары награданы Қырғызстан басшысына Түркия президенті Режеп Тайип Ердоған табыстады.
Салтанатты рәсімде сөз сөйлеген Садыр Жапаров түркі мемлекеттерінің басшыларына алғыс білдірді. Ол бұл марапатты жеке жетістігі ғана емес, қырғыз халқының түркі елдері арасындағы ынтымақтастықты нығайтуға қосқан үлесіне берілген жоғары баға ретінде қабылдайтынын атап өтті.
Қырғызстан президенті түркі халықтарын ортақ тарих, мәдениет пен рухани құндылықтар байланыстыратынына да тоқталды. Оның айтуынша, осы тарихи және мәдени жақындық мемлекеттер арасындағы әріптестікті одан әрі дамытуға негіз болады.
Түркі әлемінің жоғары ордені ұйым аясындағы ынтымақтастықты дамытуға және түркі халықтары арасындағы байланысты нығайтуға қосқан үлесті мойындаудың маңызды белгісі саналады. Садыр Жапаровтың марапатталуы Қырғызстанның түркі мемлекеттерімен қарым-қатынасындағы маңызды оқиғалардың бірі болды.
