Келешегі зор жобаның операторы – «Zhylyoi Operating» ЖШС. Барлау кезеңіндегі барлық қаржылық шығындар мен тәуекелдерді қытайлық тарап толығымен өз мойнына алған. Жаңа көмірсутектерді іздеу аумағы Каспийдің солтүстік-шығыс жағалауы бойындағы 958 шаршы шақырымды қамтиды. Құрлықтан теңізге өтетін бұл транзиттік аймақ өнеркәсіптік тұрғыдан игеру үшін өте күрделі саналады және қатаң экологиялық, техникалық талаптарды сақтауды міндеттейді.
«ҚазМұнайГаз» баспасөз қызметі SHYNDYK.KZ редакциясына түсіндіргендей, жағалаудағы нәзік экожүйеге зиян келтірмеу үшін мамандар кабельсіз сигнал қабылдағыштардан бастап жоғары ажыратымдылықтағы төмен жиілікті діріл көздеріне дейінгі озық технологияларды қолдануда. Зерттеу қорытындысы бойынша жасалатын жер қойнауының 3D-моделі мұнай қорын нақты бағалап, алғашқы іздестіру ұңғымасын бұрғылау орнын дәл анықтауға мүмкіндік береді. Қазақстан үшін бұл жоба елдің ресурстық базасын толықтыру стратегиясындағы маңызды қадам болып табылады.
