Құрылтай отырысында «Ақ жол» демократиялық партиясының депутаты Мейраш Шынасылова ауыл шаруашылығы саласындағы жоспарланған жаңашылдықтарды қатаң сынға алды. Ол бейінді министрліктің мал өсірушілерді мал басын сәйкестендіруді өз қаражаты есебінен жүргізуге заң жүзінде міндеттемекші екенін атап өтті. Бұған дейін бұл рәсімдер мемлекеттік бюджеттен қаржыландырылып келген болатын.
Бұдан бөлек, бизнеске тағы бірқатар қосымша міндеттемелер жүктелмек: өнімді міндетті түрде таңбалау, жануарларды карантинде ұстау ақысын төлеу және штатқа ветеринар дәрігерлерді міндетті түрде жұмысқа қабылдау талабы. Депутат ведомство басшылығына бұл талаптардың қаншалықты негізді екенін және бизнестің жаңа қаржылық шығындарды көтеруге дайын ба деген төте сұрақ қойды.
Сынға жауап берген Ауыл шаруашылығы вице-министрі Ермек Кенжеханұлы бұл өзгерістер елдің азық-түлік және ветеринариялық қауіпсіздігін қамтамасыз ету қажеттілігінен туындап отырғанын алға тартты.
Шенеуніктің сөзінше, бюджеттік қаржыландырудан бас тарту фермерлер үшін қосымша ауыртпалық болмайды, өйткені министрлік бұл қадамдарды ауыл шаруашылығы тауарын өндірушілермен алдын ала талқылап, олардың толық қолдауына ие болған.
