Астана – Анталия бағытындағы ұшақ таңғы сағат 07:20-да көкке көтерілуі керек еді. Алайда рейс бірнеше рет кейінге шегерілген. Соңғы хабарланған уақыт – 15:00. Дегенмен ұшақтың дәл осы уақытта ұшатынына кепілдік жоқ.
Жағдай туралы астаналық адвокат Әсел Бикенова әлеуметтік желіде айтып берді. Оның сөзінше, жолаушылар әуежайға таң атпай келіп, тіркеуден өткен. Бірақ кейін рейстің кешігетіні белгілі болған.
«Біз таңғы сағат үш жарымда тұрдық. Әуежайға келіп, тіркеуден өттік. Олар сол кезде-ақ рейстің кешігетінін білген. Соған қарамастан бәрімізді тіркеуден өткізді. Қазір әуежайда күтіп отырмыз», – деді Бикенова.
Адвокаттың айтуынша, жолаушыларға Анталияға ұшатын әуе кемесінің Мәскеуде екені хабарланған. Внуково әуежайы әуе қорғанысы жүйесінің жұмысына байланысты уақытша жабылғандықтан, ұшақ Астанаға жете алмай отыр.
Мәскеудегі әуе кеңістігінің қашан ашылатыны және ұшақтың елордаға қашан келетіні әзірге белгісіз.
Жолаушылар әуе компаниясының қосалқы ұшақ қарастырмағанына да наразы. Олардың айтуынша, барлығы Мәскеудегі әуе кемесінің келуін күтуге мәжбүр.
«Ұшу уақытын шамамен 15:00-ге белгіледі. Бірақ сол уақытта ұшатынымыз да нақты емес», – деді автор.
Жолаушылардың наразылығын әуе компаниясының сусындарды әуежайдың екінші қабатынан алуға болатыны туралы ұсынысы да күшейткен.
Түркияға демалуға бара жатқан азаматтар алдын ала төленген демалысының бір күнінен айырылып қалуы мүмкін екенін айтып отыр.
SCAT өкілі рейстің кешігуі Внуково әуежайының әуе қорғанысы жүйесінің жұмысына байланысты жабылуынан болғанын растады.
Әсел Бикенова өзіне белгілі ақпаратқа сүйеніп, рейс 24 сағаттан аз уақытқа кешіксе және қонақүйге орналасу шарттары бұзылмаса, жолаушыларға өтемақы төленбеуі мүмкін екенін айтты. Алайда бұл ақпаратқа қатысты ресми құқықтық түсіндірме берілген жоқ.
Материал жарияланған сәтте жолаушылар әуежайда ұшуды күтіп отыр. Ұшақтың Астанаға қашан келіп, Анталияға қай уақытта аттанатыны әзірге белгісіз.
