Менің жақын досым, аса құрметті Қытай Халық Республикасының Төрағасы Си Цзиньпин мырзаның жеке назары мен берік қолдауы екіжақты қатынастарды бұрын-соңды болмаған жоғары деңгейге көтерді. Жаңа «алтын отыз жылдықтағы» қазақ-қытай ынтымақтастығы барлық негізгі салада жан-жақты сипатқа ие болды. Қытай — Қазақстанның негізгі сауда серіктесі. Былтырғы қорытынды бойынша тауар айналымы рекордтық 50 миллиард долларға жуықтады. Үкіметтеріміз өзара сауда көлемін 100 миллиард долларға дейін арттыру үшін белсенді жұмыс істеп жатыр. Инвестициялық ынтымақтастық та қарқынды дамуда. Қытай Халық Республикасы Қазақстан экономикасына жалпы көлемі 29 миллиард доллардан астам инвестиция салған ірі инвесторлардың қатарына кіреді. Қазақстанда Қытайдың қатысуымен тоғыз мыңнан астам кәсіпорын табысты жұмыс істеп жатыр. Бұл — елімізде тіркелген шетелдік компаниялардың шамамен әрбір жетіншісі, – деді Мемлекет басшысы.
Президент өнеркәсіп, цифрландыру, «ақылды қалаларды» дамыту, спутниктік технологиялар, ауыл шаруашылығы, денсаулық сақтау және білім беру салаларындағы серіктестік дәйекті түрде нығайып келе жатқанын айтты. Оның сөзінше, Инвестицияларды ынталандыру және өзара қорғау туралы келісімнің ратификациялануы екіжақты ынтымақтастықты кеңейтудің маңызды құқықтық негізіне айналды.
– Елдеріміз арасында орнатылған визасыз режим де іскерлік байланыстарды кеңейтуге елеулі үлес қосып отыр. Қазіргі уақытта Қазақстанда ауқымды инвестициялар тартуға және ірі жобаларды жүзеге асыруға барынша қолайлы жағдай жасалғанын сеніммен айтуға болады. Биылғы 1 шілдеде күшіне енген Конституцияның негізгі ережелері елдің инвестициялық әлеуетін нығайтудың қуатты құқықтық іргетасын қалыптастырады, – деді Қасым-Жомарт Тоқаев.
