Қазақстанның 2027–2029 жылдарға арналған республикалық бюджетінің жобасы қоғамдық талқылаудан өтті. Енді құжат қараудың және бекітудің келесі рәсімдерінен өтуі тиіс. Осыған байланысты қоғам белсендісі Мұрат Әбенов бюджет қаражатын өңірлер арасында бөлудің тәсілін өзгерту қажет деп санға алды, деп хабарлайды SHYNDYK.KZ
Оның пікірінше, қолданыстағы жүйе жекелеген облыстардағы қаржы тапшылығын өтеумен ғана шектелмей, олардың экономикалық дамуына жағдай жасауы керек. Әбенов бюджетке көбірек үлес қосатын өңірлер мен ұзақ уақыт бойы республикалық бюджеттен берілетін трансферттерге тәуелді аймақтар арасындағы айырмашылыққа назар аударды.
«Бізде ел экономикасын алға сүйреп отырған донор өңірлер бар. Екінші жағынан, ондаған жыл бойы бюджет субвенцияларына тәуелді өңірлер бар», – деді ол.
Әбеновтің айтуынша, бюджет қаражатын бөлген кезде нақты нәтижелер ескерілуі қажет. Ол негізгі көрсеткіштер ретінде жаңа жұмыс орындарын ашу, кәсіпорындар іске қосу және жеке инвестиция тартуды атады.
Оның пікірінше, егер өңір экономикалық белсенділігін арттырып, инвестор тарта алса, одан түсетін қосымша салық түсімдерінің бір бөлігі сол аумақта қалып, инфрақұрылымды дамытуға бағытталуы керек.
«Қаражатты “бізде ақша жетіспейді” деген себеппен емес, нақты KPI көрсеткіштеріне байланысты беру керек», – деді қоғам белсендісі.
Әбенов сондай-ақ 2027 жылға арналған республикалық бюджет жобасында көрсетілген 4,56 трлн теңге көлеміндегі бюджет тапшылығына тоқталды. Оның пікірінше, мұндай жоғары тапшылық мемлекеттің борыштық жүктемесін арттырып, экономикада күтпеген жағдайлар туындаған кезде қаржылық мүмкіндіктерді шектейді.
Ол бюджет қаражатын бөлу процесін барынша ашық етуді де ұсынды. Өңірлер жаңа жобалардың қажеттілігін негіздеп, бөлінген қаражаттың қалай жұмсалғаны туралы есеп беріп, алдын ала белгіленген көрсеткіштерді орындауы тиіс.
Осылайша, Әбенов бюджеттен бөлінетін қаржыны оның көлемімен ғана емес, ел экономикасына әкелетін нақты нәтижесімен бағалауды ұсынады. Оның пікірінше, мұндай тәсіл өңірлерді жаңа жұмыс орындарын ашуға, инвестиция тартуға және өз кіріс базасын ұлғайтуға ынталандыруы мүмкін.
«Бюджет кедейлікке деген тәуелділікті күшейтпей, дамуға ынталандыруы керек», – деп түйіндеді Мұрат Әбенов.
