Франциядағы оқушылардың жаппай наразылығына білім беру саласындағы бірқатар мәселе түрткі болған. Жастар мұғалім тапшылығын шешуді, мектептердің жағдайын жақсартуды және білім саласына бөлінетін қаржыны көбейтуді талап етіп отыр.
Қазан айының басында жағдай күрт шиеленісті. 1 қазанда наразылық елдегі мыңнан астам лицейді қамтып, оның 222-сінде оқушылар ғимаратқа кіретін жолды жапқан. Сол күні полиция шамамен 1 950 адамды ұстады. 2 қазанда тағы 1 747 адам ұсталды.
Наразылық кезінде кейбір қалаларда полиция мен оқушылар арасында қақтығыс болып, мектеп ғимараттары бүлінген. Қауіпсіздік мәселесіне байланысты жүздеген білім беру мекемесі жұмысын тоқтатуға мәжбүр болды. Кей мектептер сабақтарды онлайн форматқа ауыстырды.
4 қазандағы мәлімет бойынша, тәртіпсіздіктер кезінде кемінде 170 оқушы мен білім саласының 78 қызметкері зардап шеккен.
Оқушылар оқу жүктемесін қайта қарауды және жоғары оқу орнына түсу кезінде түсетін қысымды азайтуды да талап етіп отыр. Сондай-ақ білім беру жүйесіне қосымша қаражат бөлінуі қажет екенін алға тартқан.
Франция билігі оқушылардың бейбіт талаптары мен күш қолдану, мүлікті бүлдіру әрекеттерін бөлек қарастыру керегін мәлімдеді. Соған қарамастан наразылық әзірге басылған жоқ. Келесі аптада білім саласы қызметкерлерінің кәсіподақтары мен студенттік ұйымдардың қатысуымен жаңа акциялар өтеді деп жоспарланған.
