Бұған дейін бұқаралық ақпарат құралдарында NCOC-тан экологиялық айыппұл өндіріп алу тоқтатылғаны туралы ақпарат тараған. Ведомство компанияның мемлекеттік сот орындаушысының әрекетіне шағым түсіргенін, осыған байланысты сот атқарушылық іс жүргізу материалдарын сұратқанын түсіндірді.
Іс қаралып, құжаттар сотта болған кезеңде атқарушылық іс жүргізу заңнамаға сәйкес уақытша тоқтатылады. Әділет министрлігі бұл өндіріп алу рәсімінің толық тоқтатылғанын білдірмейтінін атап өтті.
«Атқарушылық іс жүргізу материалдары қайтарылғаннан кейін қаражатты өндіріп алу заңда белгіленген тәртіппен жалғасады», — деп хабарлады ведомство.
Экологиялық айыппұл күкіртті сақтау талаптарының бұзылуына байланысты салынған. NCOC міндеттемені 20 шілдеге дейін ерікті түрде орындауға тиіс болғанымен, белгіленген соманы төлемеген. Қаражатты өндіріп алудың заңдылығы бұған дейін Қазақстан соттарында қаралған.
NCOC — Қашаған кен орнының операторы. Консорциум құрамына «ҚазМұнайГаз», ExxonMobil, Eni, Shell, TotalEnergies және басқа да ірі мұнай-газ компаниялары кіреді.
