АҚШ-тың шығыс жағалауына «норд-ост» деп аталатын күшті дауыл соқты. Нөсер жауын көшелер мен тұрғын аудандарды су басуына әкелсе, қатты жел ағаштарды құлатып, электр желілерін зақымдады. Бірқатар аймақта төтенше жағдай режимі енгізілді.
Бруклинде құлаған ағаш 56 жастағы ер адамның өмірін қиды. Дауыл кезінде желдің екпіні сағатына 130 шақырымға дейін жеткен.
Жағалаудағы аудандар қатты зардап шекті. Куинсте көшелерді су басқаны сонша, кейбір тұрғындар көліктің орнына каякпен жүруге мәжбүр болған. Кони-Айленд пен Нью-Джерсидің бірқатар елді мекенінде де су басу деректері тіркелді.
Нью-Йорк, Лонг-Айленд, Уэстчестер округі және Нью-Джерсидің барлық округінде төтенше жағдай режимі күшінде.
Синоптиктер қауіп әлі сейілмегенін ескертті. Су деңгейі көтерілуіне байланысты жағалаудағы аумақтарды қайта су басуы мүмкін.
