Әлеуметтік желіде қызымен түскен видеосы қызу талқыға түскен ер адам көпшіліктің сынына жауап берді. Ол өз әрекетін заңға қайшы деп есептемейтінін және ешкімнің алдында ақталмайтынын мәлімдеді.
«Біз ешкімнің алдында ақталмаймыз. Біз ешқандай қылмыс жасаған жоқпыз», – деді қыздың әкесі.
Ер адам бұл әрекетін әкелік махаббаттың көрінісі деп түсіндірген. Сондай-ақ өзін сынағандарға «Ит үреді, керуен көшеді» деген мақалмен жауап беріп, өз ұстанымының дұрыстығын дәлелдеу үшін соңына дейін күресетінін жеткізді.
Әлеуметтік желіде ерлі-зайыптының даулы видеоны таратқан қолданушылардың үстінен арыз жазуға ниетті екені туралы да ақпарат тарады. Алайда бұл мәлімет әзірге ресми түрде расталған жоқ.
Ал осы уақытта қыздың анасы әлеуметтік желідегі парақшасына қызығушылық артқанын пайдаланып, жарнама берушілерге ұсыныс жасаған.
«Шұғыл жарнама бергісі келетіндер бар ма? ОСы сәтті пайдаланып қалыңдар. Қаралым көрсеткіші өсіп жатыр. Прайсты жекеге жазамын», – деп жазған ол.
Осылайша, отбасы қоғамның қызу талқысына түскен оқиғадан кейін әлеуметтік желідегі танымалдылығын жарнама арқылы табыс табуға пайдалануға кіріскен.
Еске салайық, бұған дейін құқық қорғаушы Ләззат Рақышева аталған видеоға байланысты полицияға жүгінген болатын.
Осыдан кейін полиция оқиғаны тіркеп, отбасыға қатысты тексеру бастады. Оған білім басқармасының, жергілікті атқарушы органның және қорғаншылық органдарының өкілдері тартылған.
Әзірге ата-ананың әрекетіне түпкілікті құқықтық баға берілген жоқ.
