Екі ел арасындағы тікелей әуе қатынасын қалпына келтіру жоспары туралы Францияның Қазақстандағы елшісі Сильван Гиоге мәлімдеді, деп хабарлайды SHYNDYK.KZ. Дипломаттың айтуынша, тараптар бұл мүмкіндікті талқылап жатыр, бірақ әзірге нақты келісімдерге қол қойылмаған.
Еске салайық, бұған дейін ұлттық тасымалдаушы Air Astana Францияға тікелей рейстер орындаған болатын. Алайда COVID-19 пандемиясының салдары мен ұшақтарда жолаушылардың аз болуына байланысты бұл бағыт тоқтатылды.
Тікелей рейстердің қайта ашылуы екіжақты іскерлік байланыстарды нығайтып, Францияға баратын қазақстандық туристердің санын арттыруға септігін тигізеді деп күтілуде. Дегенмен, елші мұндай бағыттарды екі елдің үкіметі тікелей аша алмайтынын, шешуші сөз тек әуе компанияларының еншісінде екенін қадап айтты.
