Солтүстік Қазақстан облысының табиғатты қорғау прокуратурасы жер қойнауын пайдалану саласына жүргізген талдау барысында бірнеше заң бұзушылықты анықтады.
Тексеру кезінде Петропавлға жақын аумақта кәсіпкердің қажетті заңды негізсіз саз өндіргені белгілі болды. Құқық қорғау органдары бұл деректі тіркеп, материалдарды экология саласындағы уәкілетті органға жолдаған.
Нәтижесінде кәсіпкерлік субъектісі әкімшілік жауапкершілікке тартылды.
Прокуратура бұдан бөлек, жер қойнауын пайдаланушылардың өңір алдындағы қаржылық міндеттемелерін де орындамағанын анықтады.
2024–2025 жылдары 11 жер қойнауын пайдаланушы өңірдің әлеуметтік-экономикалық дамуына арналған 10,5 млн теңгені төлемеген.
Ал жер асты суларын пайдаланатын тағы 26 субъект мемлекетке төленуі тиіс жалпы сомасы 29 млн теңге болатын қол қою бонусын өтемеген.
Қадағалау шараларының нәтижесінде мемлекет бюджетіне 18 млн теңге өндірілді. Қалған берешекті өндіру жұмыстары жалғасып жатыр.
Прокуратура азаматтар мен ұйымдарды жер қойнауын пайдалану саласындағы заң талаптарын сақтауға шақырды.
