Тайландтың ең танымал шипажайларының бірі саналатын Пхукет аралында нөсер жауынның кесірінен кенеттен су тасып, балшық көшкіні жүрді. Таудан құлаған қатты ағын өзімен бірге тас, топырақ пен түрлі қоқыстарды ағызып әкеліп, тұрғын аудандарды, дүкендер мен көшелерді басып қалған.
Табиғи апаттан әсіресе Патонг ауданы қатты зардап шекті. 26 қазан күні таңсәріде Кхао-50-Пи төбесінен төмен қарай лап қойған лай көшкіні На Най ауданын түгелдей дерлік су астында қалдырған. Кей жерлерде жеңіл көліктер балшық пен тастың астында қалып, жергілікті тұрғындардың үйлері мен сауда орындары қирады.
Жергілікті биліктің мәліметінше, қолайсыз ауа райының салдары аралдың барлық үш ауданына, соның ішінде Пхукет қаласына да кері әсерін тигізген. Шамамен 100 шақты шаңырақ зардап шекті деп бағалануда. Дүйсенбі күнгі таңертеңгі ақпарат бойынша, қаза тапқандар мен жарақат алғандар туралы мәлімет түскен жоқ.
Су деңгейі сәл төмендегеннен кейін коммуналдық қызметкерлер мен құтқарушылар көшелерді тазартуға кірісті. Лай мен тасты, сондай-ақ жиналып қалған қоқысты шығару үшін ауыр техника жұмылдырылды. Сонымен қатар, Патонгта зардап шеккен тұрғындарға арнайы көмек көрсету пункттері ашылды.
Дегенмен, қауіп әлі сейілген жоқ. Тайландтың метеорологиялық қызметі елдің оңтүстігінде кем дегенде 28 қазанға дейін нөсер жауын жауатынын ескертті. Толассыз жауын-шашын қайтадан су тасқыны мен көшкіннің жүруіне түрткі болуы әбден мүмкін.
