Рудныйда Chevrolet Cobalt көлігінің жүргізушісі полиция қызметкерлерінің тоқтау туралы талабын орындамай, қашып кетуге тырысқан. Қуғын кезінде ол қызметтік көлікпен соқтығысқан.
Оқиға Корчагин көшесінде болған. Патрульдік полиция қызметкерлері екінші жолаққа ауысқан кезде бұрылыс белгісін қоспаған Chevrolet Cobalt көлігін байқап, жүргізушіден тоқтауды талап еткен. Алайда ер адам полицияның талабын елемей, қозғалысын жалғастырған.
Қуғын барысында жүргізуші бағдаршамда тоқтап тұрған полиция көлігіне соғылған.
Жүргізуші ұсталып, медициналық куәландыруға жеткізілді. Тексеру нәтижесінде оның көлікті мас күйінде басқарғаны анықталған. Осыған байланысты оған қатысты әкімшілік хаттама толтырылды.
Оқиға бойынша тексеру жүргізіліп жатыр.
