Оның есебінше, 2026 жылы медициналық ұйымдар бюджетке шамамен 32 млрд теңге салық төлеуі мүмкін. Алайда мемлекеттік медицина мекемелерінің шығыны 44 млрд теңгеге жетеді деген болжам бар. Бұл күтілетін салық түсімінен 12 млрд теңгеге көп. Ал жалпы медицина саласының таза пайдасы 108 млрд теңгеге немесе 67 пайызға қысқаруы ықтимал.
Сарапшылар 2027 жылға арналған екі сценарийді қарастырған. Бірінші жағдайда, салық түсімдері болмаған кезде мемлекеттік медициналық ұйымдардың шығыны 133 млрд теңгеге жетуі мүмкін. Екінші сценарий бойынша ҚҚС медициналық қызмет тарифтеріне енгізілсе, тегін медициналық көмектің кепілдік берілген көлемі (ТМККК) мен міндетті әлеуметтік медициналық сақтандыру (МӘМС) аясындағы тарифтерді көтеруге бюджеттен шамамен 293 млрд теңге қажет болады. Ал бүкіл саладан түсетін салық көлемі 100 млрд теңге шамасында ғана болуы мүмкін.
Осылайша, екінші сценарийде бюджеттен жұмсалатын қосымша қаражат күтілетін салық түсімінен үш есеге жуық көп. Тарифтер көтерілген күннің өзінде 2027 жылы медицина саласының жиынтық қаржылық нәтижесі теріс болып, шығын 116 млрд теңгеге жетуі ықтимал.
Сарапшылар жеке клиникалардың мемлекеттік тапсырыстан бас тарту қаупіне де назар аударды. 2025 жылы жекеменшік медициналық ұйымдар ТМККК мен МӘМС аясында шамамен 602 млрд теңге алған. Бұл мемлекеттік тапсырыстың жалпы көлемінің 21 пайызына тең. Салық жүктемесі артса, кейбір клиникалар аталған бағдарламалар бойынша қызмет көрсетуді тоқтатуы мүмкін.
Мұндай жағдайда мемлекеттік емханалар мен ауруханаларға түсетін жүктеме артады. Сарапшылардың бағалауынша, қосымша науқастарды қабылдау үшін медициналық жабдықтар, қажетті материалдар мен бейінді мамандар жетіспеуі мүмкін. Соның салдарынан азаматтардың медициналық көмек алу үшін күту уақыты ұзаруы ықтимал.
