Құрылтай Қылмыстық істер бойынша өзара құқықтық көмек туралы Еуропалық конвенцияны екі оқылымда қарап, ратификациялады, деп хабарлайды SHYNDYK.KZ.
Құжат Қазақстанның басқа мемлекеттермен қылмыстық істерді тергеу саласындағы ынтымақтастығын кеңейтуге мүмкіндік береді. Атап айтқанда, қазақстандық құқық қорғау органдары шетелден қылмыстық істер бойынша дәлелдемелер ала алады, сондай-ақ заңсыз жолмен алынған және шетелге шығарылған активтерді іздеу, оларға тыйым салу және елге қайтару бойынша шаралар қабылдай алады.
Конвенцияға сәйкес, оған қатысушы мемлекеттер белгіленген талаптарды сақтай отырып, қылмыстық істер бойынша бір-біріне өзара құқықтық көмек көрсетеді.
Қазақстан Конвенцияға алты ескертпе және мәлімдемемен қосылады. Соның бірі – мүлікті іздеу немесе оған тыйым салу туралы сұрау екі елде де тиісті әрекет қылмыстық құқық бұзушылық болып саналса және Қазақстан заңнамасына сәйкес келсе ғана орындалады.
Құқықтық көмек туралы сұрауларды жіберу және қабылдау бойынша Қазақстанда екі орталық орган белгіленді. Сот өндірісіндегі қылмыстық істерге қатысты сұрауларға Жоғарғы Сот, ал қалған қылмыстық істер бойынша Бас прокуратура жауап береді.
Заң жобасын Құрылтай отырысында Бас прокурордың орынбасары Ғалымжан Қойгелдиев таныстырды. Оның айтуынша, Қазақстан бұл конвенцияға қосылу бағытында Сыртқы істер министрлігімен бірлесіп 2001 жылдан бері жұмыс жүргізген. 2025 жылдың маусымында еліміз Конвенцияға қосылуға ресми шақырту алған.
Қылмыстық істер бойынша өзара құқықтық көмек туралы Еуропалық конвенция 1959 жылы Страсбургте қабылданған. Құжатқа қосылу трансұлттық қылмыстарды тергеу кезінде халықаралық ынтымақтастықты күшейтуге және заңсыз шығарылған активтерді қайтару тетіктерін кеңейтуге мүмкіндік береді.
