Ғалия Адамбай әлеуметтік желідегі жазбасында бастапқыда отбасылық мәселелерді көпшілік алдында талқылауды тоқтатпақ болғанын айтты. Алайда күйеуінің қорқытуынан кейін болған жағдайларды қайта жариялауға шешім қабылдаған. Нұртас Адамбайдың нақты қандай қоқан-лоқы жасалғаны ашып айтылмады.
Ғалия Адамбайдың сөзінше, ерлі-зайыптылар арасындағы келіспеушіліктердің бірі бала тәрбиесіне байланысты болған. Тіпті балалардың жеке тазалығын сақтау мәселесінде де жанжал туындаған.
Атап айтқанда, оның мәлімдеуінше, Нұртас Адамбай үш жасар қызы тісін тазалағысы келмесе, оны мәжбүрлеуге қарсы болған.
Сондай-ақ Ғалия күйеуінің өзі «секта» деп атайтын діни топтың ықпалында жүргенін алға тартты. Ол бұл топты Төребек Бекбаев есімді азаматпен байланыстырады.
Ғалия Адамбайдың айтуынша, Бекбаевқа телінетін ұстанымдардың қатарында бала дәрі ішкісі келмесе, дәрігер тағайындаған емнен бас тарту және науқас баланың келісімінсіз медициналық көмекке жүгінбеу туралы түсініктер бар.
Ғалия мұндай көзқарастардың өз отбасына және балаларының денсаулығына кері әсер еткенін мәлімдеді.
«Менің балаларым, менің отбасым осыдан зардап шекті», – деп жазды ол.
Ол балаларына медициналық диагноздар қойылғанын да айтты. Алайда олардың қандай ауруға шалдыққанын нақтыламады.
Ғалия Адамбай алдағы уақытта соңғы бес жылда отбасында болған оқиғаларды толық баяндап, өз сөзін растайды деп есептейтін құжаттарды, соның ішінде мамандардың қорытындыларын жариялауға уәде берді.
Әзірге бұл айыптаулар тек Ғалия Адамбайдың мәлімдемелеріне негізделген. Оның сөздерін растайтын тәуелсіз деректер ұсынылған жоқ. Нұртас Адамбай мен Төребек Бекбаевтың аталған айыптауларға қатысты ұстанымы белгісіз.
