Таразда 29 жастағы ер адам ауыр соққыдан кейін қайтыс болды. Оқиғаға қатысты полиция тергеу жүргізіп жатыр.
Qumash мәліметінше, марқұм медицина саласында еңбек еткен. Оның әпкесінің айтуынша, оған пациенттерінің бірінің бұрынғы күйеуі бірнеше рет қоңырау шалып, балағат сөздер айтқан. Кейін ол кездесуге шақырған.
Туысының сөзінше, кездесуге барған ер адамға үш адам жабылып, соққыға жыққан. Кейін оны Аса өзенінің маңына апарып тастаған.
Әпкесі кейін ер адамды өзінің көлігіне салып, ауруханаға жеткізгенін айтты. Алайда дәрігерлерге оны көшеден тауып алғаны айтылған. Жәбірленуші есін жимастан қайтыс болды.
Туыстарының айтуынша, бастапқыда күдікке ілінген үш адамның барлығы ұсталған. Кейін олардың екеуі босатылған. Отбасы сондай-ақ істің куәгеріне қысым жасалуы мүмкін деп алаңдайды.
Марқұмның артында екі кішкентай қызы қалды. Туыстары болған жағдайға қатысы бар адамдардың барлығы заң алдында жауап беруін талап етіп отыр.
Жамбыл облысының полиция департаменті оқиғаның шамамен бір ай бұрын болғанын растады. Қазіргі уақытта осы дерек бойынша сотқа дейінгі тергеу жүріп жатыр.
