Тараз қаласының тұрғыны түнде болған ауыр жол-көлік оқиғасының куәгері болып, оқиға орнынан қорқынышты кадрлармен бөлісті, деп хабарлайды SHYNDYK.KZ. Видеодан соғысқан көліктердің бірі толығымен өртеніп жатқанын, ал екіншісінің аударылып қалғанын көруге болады.
Куәгердің айтуынша, ол өз көлігімен кетіп бара жатып, көз алдында болған жойқын соқтығысуды байқаған. Ер адам дереу тоқтап, көмектесуге ұмтылған. «Газдың иісін сезіп, ең алдымен адамдарды шығарып алу керектігін түсіндім, содан кейін барып жедел жәрдем мен өрт сөндіру қызметін шақырдық», — дейді видео авторы. Құтқарушылар келгенше бейжай қарамаған азаматтар аударылған көліктен адамдарды шығарып алуға тырысқан.
Жамбыл облыстық ТЖД бұл ақпаратты растады. 23 қазан күні сағат 02:34-те «112» пультіне Тараздағы Бөлтірік шешен және Ұлбике ақын көшелерінің қиылысында жол апатынан кейін көліктің өртенгені туралы хабарлама түскен. Оқиға орнына жеткен өрт сөндірушілер жанып жатқан көлікті 02:48-де сөндіріп үлгерді. Ведомствоның ресми мәліметінше, қаза тапқандар мен зардап шеккендер жоқ.
SHYNDYK.KZ редакциясы оқиғаның мән-жайын және жол апатының себептерін толық анықтау үшін Жамбыл облысының Полиция департаментіне ресми сауал жолдады.
