Әнші әрі блогер Анара Батырхан Республика күні мерекесі қарсаңында «Ерен еңбегі үшін» мемлекеттік медаліне ие болды. Марапатты оған Алматы әкімі Дархан Сатыбалды табыстаған.
Алайда бұл жаңалық желі қолданушыларының арасында қызу талқыға түсіп, үлкен дау тудырды. Қазақстандықтар өнер иесінің нақты қандай сіңірген еңбегі үшін мемлекеттік марапатқа ие болғанына шын мәнінде таңғалып, сұрақ астына алуда.
Пікір қалдырушылар Анара Батырханның негізінен тойлар мен корпоративтерде өнер көрсететінін, сондай-ақ TikTok желісінде белсенді түрде тікелей эфирлер жүргізетінін алға тартқан. «Күні бойы TikTok-та отырады, эфирге шығып, сыйлықтар жинайды. Енді сол үшін де медаль беретін болған ба?» — деп ашынады желі қолданушылары.
Көптеген азаматтар блогердің марапатталуын ондаған жыл бойы табан ақы, маңдай терімен еңбек етіп жүрген мұғалімдер мен басқа да қарапайым мамандық иелерінің жұмысымен салыстырып, дәл сондай мемлекеттік құрметке нағыз еңбек адамдары лайық екенін кесіп айтты.
Сынның астында қалған Анара Батырхан марапаттау туралы жазбасының пікір жазу бөлімін жауып тастауға мәжбүр болды. Дегенмен, басқа ашық парақшалар мен қоғамдық талқылауларда оқырмандар «артист нақты қандай үлесі үшін мемлекеттік награда алды?» деген сұрақты қоюды әлі де тоқтатар емес.
