Оқиға 29 қазанда болған. Кен жұмысшысы вагондарды тіркеу кезінде ауыр жарақат алған. Ол Хромтау қаласындағы орталық аудандық ауруханаға жеткізілгенімен, дәрігерлер оның өмірін сақтап қала алмады.
Дон тау-кен байыту комбинаты Eurasian Resources Group (ERG) құрамындағы «Қазхром» компаниясына тиесілі. Кәсіпорын өкілдерінің мәліметінше, қайғылы оқиға туралы тиісті мемлекеттік органдарға хабарланған. Сондай-ақ марқұмның отбасына қажетті көмек көрсетілетіні айтылды.
Қазір жұмысшы өлімінің себептері мен мән-жайын анықтау үшін арнайы комиссия құрылмақ. Оның жұмысына Ақтөбе облысы бойынша Мемлекеттік еңбек инспекциясы комитетінің департаменті қатысады. Тексеру барысында еңбек қауіпсіздігі мен еңбекті қорғау талаптарының қаншалықты сақталғаны анықталады.
Айта кетейік, бұл – Дон тау-кен байыту комбинатында тоғыз күн ішінде болған екінші адам өлімі. 20 қазанда «Болашақ» шахтасында қорғаныш бекітпесін орнату кезінде тау жынысы опырылып, 24 жастағы үңгуші қаза тапқан. Аталған оқиғаға байланысты полиция тау-кен немесе құрылыс жұмыстарын жүргізу кезінде қауіпсіздік ережелерін бұзу салдарынан абайсызда адам өліміне әкеп соғу дерегі бойынша қылмыстық іс қозғаған.
Осылайша, екі аптаға жетпейтін уақыт ішінде бір комбинаттың екі шахтасында екі жұмысшы көз жұмды. Соңғы қайғылы оқиғаға қатысты тергеу нәтижесі әзірге жарияланған жоқ.
