Маркус Зёдермен өткен келіссөздер барысында Мемлекет басшысы Баварияның экономикалық қуаты мен инновациялық әлеуетін атап өтті. Ол Баварияның Берлинде Германия басшылығымен қол жеткізілген уағдаластықтарды жүзеге асыруда маңызды рөл атқаратынын айтты.
Тоқаев Баварияның технологиялық мүмкіндіктерін Қазақстанның өнеркәсіптік және ресурстық әлеуетімен ұштастыруға мол мүмкіндік бар екенін мәлімдеді. Тараптар көлік қатынасын дамытуға, инвестиция тартуға және экономиканы әртараптандыруға ерекше назар аударды.
Ильзе Айгнермен кездесуде Президент парламентаралық ынтымақтастық пен мәдени-гуманитарлық байланыстарды кеңейту перспективаларын талқылады. Ландтаг төрағасының айтуынша, Бавария Қазақстанмен сауда-экономикалық, көлік және инвестициялық байланыстарды нығайту мүмкіндіктерін қарастырып жатыр.
Хуберт Айвангермен кездесуде тараптар тікелей іскерлік байланыстарды және технологиялық әріптестікті дамыту мәселелеріне тоқталды. Негізгі бағыттардың қатарында жоғары технологиялар, өнеркәсіп, энергетика, инновациялар және өңірлік даму бар. Айвангер Бавария бизнесінің Қазақстанмен ынтымақтастықты кеңейтуге мүдделі екенін атап өтті.
Бавария – Германияның федералдық жерлері арасында Қазақстанның негізгі экономикалық серіктестерінің бірі. Кездесулер қорытындысында тараптар ынтымақтастықты одан әрі кеңейтуге және бірлескен жобаларды жүзеге асыруға мүдделі екенін растады.
Сапар аясында Тоқаевқа ойыншылардың қолтаңбасы қойылған, аты жазылған мюнхендік «Бавария» клубының жейдесі сыйға тартылды.
