Қауіпсіздік Кеңесі мен оның Аппараты жаһандық қатерлер мен сын-қатерлерді талдап, ел ішіндегі өзекті жағдайға баға береді.
Қауіпсіздік Кеңесі Төрағасының орынбасары Мемлекет басшысының актілері мен тапсырмаларының, сондай-ақ Қауіпсіздік Кеңесі шешімдерінің орындалуын бақылайды. Ол ұлттық қауіпсіздік, қорғаныс қабілеті, заңдылық пен құқықтық тәртіп салаларындағы мемлекеттік органдардың жұмысын үйлестіреді.
Оның құзыретіне ақпараттық және киберқауіпсіздік, соның ішінде жасанды интеллектіні қолдануға байланысты қауіптер, дербес деректерді қорғау, сыбайлас жемқорлық пен экономикалық қылмысқа қарсы іс-қимыл және азаматтық қорғау мәселелері де кіреді.
Сонымен қатар Төраға орынбасары Қауіпсіздік Кеңесі Аппаратының қызметін үйлестіріп, халықаралық ынтымақтастықты жүзеге асырады.
Қауіпсіздік Кеңесінің Аппараты Президентке тікелей бағынатын және есеп беретін дербес мемлекеттік орган болып белгіленді.
Аппараттың жұмысы ұлттық қауіпсіздік саласындағы қатерлерді бақылауды күшейтуге, мемлекеттік басқарудың тұрақтылығын қамтамасыз етуге және Мемлекет басшысы мен Қауіпсіздік Кеңесі шешімдерінің орындалуына бағытталады.
