Президент Қасым-Жомарт Тоқаев Кореяның шетелдік инфрақұрылым және қала құрылысы жобаларын дамыту корпорациясының (KIND) президенті әрі бас директоры Ким Бок Хванмен кездесті.
Кездесуде қазақ-корей инвестициялық ынтымақтастығын одан әрі дамыту және Қазақстандағы ірі инфрақұрылымдық жобаларға корей тарапының қатысуы талқыланды.
Мемлекет басшысы KIND корпорациясының екі ел арасындағы инвестициялық байланыстарды дамытудағы рөлін атап өтті. Корпорация бұған дейін Үлкен Алматы айналма автокөлік жолы (БАКАД) жобасын іске асыруға қатысқан.
Кездесуде KIND-тың Alatau City жобасына қатысу перспективасына ерекше назар аударылды. Қасым-Жомарт Тоқаев жобаның әлеуеті жоғары екенін айтып, корей тарапының жаңа қаланың инфрақұрылымдық және инвестициялық бастамаларына белсенді қатысатынына сенім білдірді.
Президент сондай-ақ корпорацияны Қазақстандағы әлеуметтік және көлік инфрақұрылымын жаңғырту жұмыстарына қатысуға шақырды.
Тараптар көлік-логистика жүйесін дамыту мәселелерін де қарастырды. Атап айтқанда, Ақтау және Құрық порттарын дамыту, сондай-ақ өңірлік әуежайларды салу және жаңарту мүмкіндіктері сөз болды.
Бұдан бөлек, Қасым-Жомарт Тоқаев пен Ким Бок Хван қазақ-корей бірлескен инвестициялық қорын құру мәселесін талқылады. Қор Қазақстандағы инфрақұрылым және энергетика жобаларына корей капиталы мен технологияларын тартуға бағытталмақ.
Ким Бок Хван Қазақстанның Еуразиядағы маңызды көлік-логистикалық торап ретіндегі рөлін атап өтіп, екі ел арасындағы экономикалық ынтымақтастықты нығайтуға дайын екенін жеткізді.
Кездесу соңында бірқатар құжат бойынша алмасу рәсімі өтті. Олардың қатарында Caspian Group пен KIND арасындағы өзара түсіністік туралы меморандум, Alatau City Authority мен KIND арасындағы Alatau Smart City жобасының бас жоспарын әзірлеу туралы келісім, сондай-ақ Qazaqstan Investment Corporation мен KIND арасындағы стратегиялық келісім бар.
