Президент Қасым-Жомарт Тоқаев Үкіметке ұлттық компаниялармен және жеке бизнеспен бірлесіп, өнеркәсіпте жасанды интеллектіні қолдануға қатысты өзекті міндеттерді анықтау және ұдайы жаңарту механизмін әзірлеуді тапсырды.
Жасанды интеллектіні дамыту жөніндегі кеңестің үшінші отырысында Мемлекет басшысы көптеген кәсіпорындағы цифрландыру жұмыстары әлі де шашыраңқы жүргізіліп жатқанын атап өтті. Оның айтуынша, жекелеген операцияларды автоматтандыру өндіріс моделін түбегейлі өзгертпейді.
Тоқаев Үкіметке «Самұрық-Қазына» қорымен бірлесіп, негізгі бизнес-үдерістері жасанды интеллект арқылы кешенді түрде трансформацияланатын кәсіпорындарды анықтауды тапсырды. Тиімділігі дәлелденген шешімдер кейін басқа кәсіпорындарға да енгізілуге тиіс.
Президент өнеркәсіптегі ЖИ-міндеттерді шешудің бірыңғай механизмін құруды тапсырды. Ол лайықты командаларды іріктеуден бастап, шешімдерді өндірісте сынақтан өткізу мен олардың экономикалық тиімділігін бағалауға дейінгі барлық кезеңді қамтуы керек. Бұл үшін AI Challenge механизмін белсенді пайдаланып, технологиялық компанияларды, стартаптарды, ғалымдар мен жас мамандарды тарту ұсынылды.
Тоқаев Qazaq AI Research University қызметіне де жеке тоқталды. Оның айтуынша, университет мамандар даярлап қана қоймай, экономиканың нақты қажеттіліктеріне бағытталған қолданбалы зерттеулер жүргізуге тиіс.
Өнеркәсіптік шешімдерді дамыту үшін сапа, өзара байланыс және қауіпсіз пайдалану талаптары бірыңғай салалық мәліметтер базасын қалыптастыру жоспарланып отыр. Бұл ретте коммерциялық құпия, стратегиялық ақпарат және аса маңызды деректер сенімді түрде қорғалуға тиіс.
Мемлекет басшысы Кеңестің келесі отырысын көлік-логистика саласына жасанды интеллектіні енгізу мәселесіне арнауды ұсынды.
Сонымен қатар Тоқаев жасанды интеллект технологияларын қауіпсіз әрі жауапкершілікпен дамытуға бағытталған «Вашингтон моделін» қолдады. Президент оны БҰҰ аясындағы халықаралық келісімге негіз ретінде қарастыруды ұсынды.
