Кездесуге Әзербайжанның ішкі істер министрі Вилаят Эйвазов, Қырғызстанның ішкі істер министрі Ұлан Ниязбеков, Түркияның ішкі істер министрі Мұстафа Чифтчи, Өзбекстанның ішкі істер министрі Азиз Ташпулатов және Қазақстанның ішкі істер министрі Ержан Сәденов қатысты.
Қасым-Жомарт Тоқаев түркі елдерін ортақ тарихи тамыр, жақын тіл мен дәстүр және ортақ мүдде біріктіретінін атап өтті. Оның айтуынша, Түркі мемлекеттері ұйымы осы байланысты нығайтуға ықпал етіп келеді. Қазақстан ұйыммен жан-жақты ынтымақтастықты тереңдетуге басымдық береді.
Президент әлемдегі тұрақсыз ахуалға да назар аударды. Ол қазіргі сын-қатерлер батыл әрі жедел әрекет етуді талап ететінін айтып, еліміздегі саяси реформаларға тоқталды.
Мемлекет басшысы жаңа Конституцияның жалпыұлттық референдумда қабылданғанын еске салды. Оның сөзінше, азаматтардың құқықтары мен бостандықтары, сондай-ақ Заң мен Тәртіп қағидаты Конституцияда мызғымас мемлекеттік ұстанымдар ретінде бекітілген. Қазақстанда вице-президент лауазымы енгізіліп, Үкіметтің жаңа құрамы жұмысқа кірісті.
Тоқаев Қауіпсіздік Кеңесі аппаратының құрылуына да жеке тоқталды. Жаңа орган жаһандық және ұлттық сын-қатерлерді талдап, ұлттық қауіпсіздік саласындағы жұмысты үйлестіреді. Жақын арада жоғары консультативтік орган ретінде Халық кеңесін құру жоспарланып отыр.
«Осылайша, мемлекеттік басқару жүйесі түбегейлі жаңарып жатыр. Ауқымды өзгерістер барлық саланы, соның ішінде құқық қорғау қызметін де қамтиды», — деді Президент.
Кездесуде Түркі мемлекеттері ұйымының бас хатшысы Кубанычбек Омуралиев те сөз сөйледі. Жиын соңында Қасым-Жомарт Тоқаев ұйымға мүше мемлекеттердің басшыларына сәлем жолдап, достық қарым-қатынасты сақтауға шақырды.
