Істі Астана қаласының қылмыстық істер жөніндегі ауданаралық соты қарап жатыр. Соттың жабық өтуіне байланысты отырыстардың егжей-тегжейі көпшілікке қолжетімсіз. Дегенмен істің ұзақ қаралуы мен отырыстардың кейінге қалдырылуы бірқатар сұрақ туғызады: осы уақытқа дейін қанша отырыс өтті, олардың қаншасы кейінге қалдырылды және сот іс бойынша шешімді қашан шығарады?
Данияр Мейірхан 2026 жылдың көктемінде қоғам назарын аударған даудың ортасында қалды. Сол кезде ол Ішкі істер министрлігінің Есірткі қылмысына қарсы іс-қимыл комитетін басқарған. Бұл бөлімше есірткі қылмыстары мен есірткінің заңсыз айналымына қарсы күреске жауап береді.
Сәуір айында Қазақстанның Ішкі істер министрлігі қарамағындағы қызметкерлердің өтініштерінен кейін Мейірханды қызметтік міндеттерін атқарудан шеттетті. Ақпарат кеңістігінде қызметкерлердің шағымдары және жыныстық сипаттағы қысым көрсету мен өкілеттіктерін асыра пайдалануға қатысты айыптаулар тарады. Осыдан кейін Мейірхан комитетті басқаруды тоқтатты, кейін бұл қызметке жаңа басшы тағайындалды.
Сонымен қатар Мейірханға қатысты қылмыстық істер қозғалды. Қудалау, яғни сталкинг дерегі бойынша қозғалған істердің бірі кейін тоқтатылды. Ал екінші іс сотқа жетіп, қазір жабық режимде қаралып жатыр.
Төрт айға созылған сот процесіне байланысты SHYNDYK.KZ редакциясы Астана қаласының қылмыстық істер жөніндегі ауданаралық сотына ресми сауал жолдады. Редакция отырыстардың кейінге қалдырылу себептерін, өткен және шегерілген отырыстар санын, істің қазіргі қаралу сатысын және келесі сот отырысының күнін нақтылауды сұрады.
