Бурабай аудандық соты Щучинск қаласындағы «Центр плова» дәмханасында болған жарылыс пен кейінгі өртке қатысты қылмыстық іс бойынша үкім шығарды. Қайғылы оқиға салдарынан 12 адам қаза тауып, тағы 11 адам жарақат алған.
Дәмхананы жалға алған азамат жеті жылға бас бостандығынан айырылды. Сонымен қатар жазасын өтегеннен кейін оған үш жыл бойы қоғамдық тамақтану саласында қызметпен айналысуға тыйым салынды.
Сот іс бойынша тағы екі айыпталушыға да үкім шығарды. Автогаз құю станциясының директоры жеті жылға, ал газ баллондарын жеткізуші алты жылға бас бостандығынан айырылды.
Зардап шеккендерге өтемақы тағайындалды
Сот қылмыстық жазадан бөлек, жәбірленушілердің азаматтық талаптарын да қарады. Талаптар ішінара қанағаттандырылды. Әр жәбірленушіге 1 миллионнан 4 миллион теңгеге дейін өтемақы төлеу туралы шешім қабылданды.
Жарылыс болған түн
2026 жылғы 26-нан 27 ақпанға қараған түні Щучинск қаласындағы бес қабатты тұрғын үйге көршілес салынған «Центр плова» кафесінде болған.
Тергеу мәліметінше, ас үй аймағының дәлізінде тұрған газ баллонының қабырғасы зақымдалып, газ сыртқа тараған. Соның салдарынан бөлмеде жарылыс қаупі бар газ-ауа қоспасы жиналып, кейін тұтанған.
Оқиғадан кейін құтқарушылар ғимараттан бес газ баллоны мен екі оттегі баллонын алып шықты. Өрт шыққан жерден он адам құтқарылды.
Алғашында алты адамның көз жұмғаны хабарланған болатын. Кейін бұл көрсеткіш тоғызға жетті. Тағы екі зардап шегуші жансақтау бөлімінде қайтыс болды. Оқиға орнында ауыр жарақат алғандардың бірі санитарлық авиациямен Астанаға жеткізілгеннен кейін көз жұмды.
Осылайша қайғылы оқиға салдарынан 12 адам қаза тапты. Олардың басым бөлігі кафе қызметкерлері болған.
Тергеу қорытындысы
Арнайы прокурорлар қауіпсіздік талаптарының бұзылуы мен қайғылы оқиғаның салдары арасында тікелей салдырттық байланыс бар екенін анықтады.
Дәмхананы жалға алушыға өрт қауіпсіздігі талаптарын бұзды деген айып тағылды. Ал автогаз құю станциясының директоры мен газ баллондарын жеткізушіге қауіпсіздік талаптарына сай келмейтін қызмет көрсету бойынша айып тағылды.
Сот іс материалдары мен дәлелдерді зерделей келе, үш айыпталушыға да айыптау үкімін шығарды.
