Instagram желісінде жол ортасында қауіпті әрекет жасаған азаматтың видеосы тарағаннан кейін полиция оның жеке басын анықтады. Ол Шымкент қаласының 24 жастағы тұрғыны болып шықты. Ер адамның автокөлігі айыптұраққа қойылды.
Бейнежазбаны Сарыағаш аудандық полиция басқармасының қызметкерлері зерделеген. Тәртіп сақшыларының мәліметінше, жас жігіттің әрекеті жол қозғалысына қатысушылардың қауіпсіздігіне қатер төндірген.
Ер адамға қатысты заңда көзделген шаралар қолданылды. Алайда оның нақты қандай әрекет жасағаны және қандай жазаға тартылғаны полиция хабарламасында көрсетілмеген.
Полиция азаматтарды әлеуметтік желіге видео түсіру үшін өзіне және айналасындағыларға қауіп төндірмеуге шақырды.
