«Отбасы банк» бөлімшелерінің алдында таңертеңнен бері көптеген адам жиналып, кей жерлерде тіпті кіреберісте адамдар бір-бірін қысып қалған. Тұрғындар бағдарлама шеңберінде өтінім беріп үлгеру үшін банкке кіруге жаппай ұмтылған.
Сұраныстың жоғары болғаны соншалық, банк сервистеріне үлкен салмақ түсіп, жұмысында ақаулар туындады. Қаржы ұйымының мәліметі бойынша, сағат 11:30-ға дейін 300 өтінім келіп түскен. Ал кезекте тұрғандар бірнеше сағат бойы қабылдауды күтуге мәжбүр болғандарын, ал бейнебайланыс арқылы құжат тапсыру әрекеттері де үнемі нәтиже бере бермейтінін айтып шағымданды.
Банк өкілдері кешігулерді жүктеменің тым жоғары болуымен түсіндіріп, өтінімді бөлімшеге келмей-ақ, бейнеқызмет немесе кеңесшілер арқылы қашықтан ресімдеуге болатынын еске салды.
Айта кетейік, осы жолы бағдарламаға 20 млрд теңге бөлініп отыр. Салыстыру үшін айтсақ, тамыз айында өткен бірінші кезеңде банк 855 өтінім қабылдап, бөлінген лимит сол күні кешке-ақ таусылған еді.
