Алматының халықаралық әуежайында мәртебелі қонақтарды қала әкімі Дархан Сатыбалды қарсы алды.
Алматыдағы сапардың маңызды бөлігі Ядролық физика институтына бару болды. Монархтарға ғылыми-өндірістік инфрақұрылым, соның ішінде жаңа Cyclone-18/9 циклотроны мен WWR-K зерттеу реакторы таныстырылды. Мамандар ядролық медицинаны дамытуға және онкологияны емдеуге арналған радиофармпрепараттарды өндіруге ерекше назар аударды. Қазақстан мен Бельгия ынтымақтастығының жарқын мысалы ретінде 2014 жылдан бері сәтті жұмыс істеп тұрған бельгиялық IBA компаниясының Cyclone-30 циклотронын атап өтуге болады. Онда 2019 жылдан бері өндірілген препараттар 63 мың науқасты ПЭТ-диагностикадан өткізуге жеткен.
Қазақстанның бай мәдени мұрасымен танысу аясында патшалық жұпқа әсерлі ат шоуы ұйымдастырылып, дәстүрлі киіз үй мен көшпелілер тұрмысының элементтері көрсетілді. Мәдени бағдарлама барысында Филипп пен Матильда тіпті садақ атудан өз бақтарын сынап көрді.
Монархтардың сапары жаңа Almaty Museum of Arts қабырғасында аяқталды. Бұл жерде қонақтар Фернан Леже, Ричард Серра және Яёи Кусама сынды көрнекті қазақстандық және шетелдік суретшілердің туындыларын бағалады. Сонымен қатар, алматылық мұражайдың брюссельдік KANAL-Centre Pompidou-мен ынтымақтастығы аясында суретші Ула Сиклдің Clay Bodies би перформансы ұсынылды.
Еске сала кетейік, Филипп пен Матильданың 11 қазанда басталған сапары Бельгия монархының Орталық Азияға жасаған алғашқы мемлекеттік сапары болды. Бұған дейін патшалық жұп Астанада болып, ҚР Президенті Қасым-Жомарт Тоқаевпен жоғары деңгейдегі келіссөздер өткізген еді.
