Түркияның Ыстамбұл қаласында 26 жастағы Қазақстан азаматы Айсұлу Бекмаханованың өліміне қатысты тергеу басталды. Түрік БАҚ-тарының мәліметінше, құқық қорғау органдары марқұммен бірге пәтер жалдап тұрған 22 жастағы қызды және онымен көңіл қосқан 35 жастағы ер адамды күдікті ретінде ұстаған.
Қайғылы оқиға 25 қазан күні таңертең Шишли ауданындағы Эргенекон орамында болған. Алдын ала болжам бойынша, қазақстандық қыз алтыншы қабаттағы балконнан көрші ғимараттың шатырына өткен. Сол кезде ол басқан шатырдың пластикалық жабыны сынып кетіп, бойжеткен минус екінші қабатқа (жертөле деңгейіне) құлап, оқиға орнында тіл тартпай кеткен.
Белгілі болғандай, оқиғаның алдында Айсұлу өзімен бірге тұратын Ресей азаматымен далаға шыққан. Таңғы сағат 05:00 шамасында ол кездесіп жүрген жігітіне барып, одан 07:40-та шығып кеткен. Құрбысының айтуынша, пәтерге оралған соң Айсұлу көрші ғимараттың шатырына шығып, шетіне барып отырған. Ол қызды қауіп туралы ескертіп, құлап кетпес бұрын оны суретке түсіріп үлгергенін айтады.
Қазақстандық бойжеткен Түркияға қыркүйек айында туристік визамен барған екен. Мәйіт сот-медициналық сараптама жасау үшін мәйітханаға жеткізілді. ҚР Сыртқы істер министрлігі марқұмның туыстарымен тікелей байланыста екенін және оларға барлық қажетті консулдық-құқықтық көмек көрсетіліп жатқанын мәлімдеді. Жағдай министрліктің қатаң бақылауында, ал Түркия билігі тергеу амалдарын жалғастыруда.
