2026 жылдың тоғыз айының қорытындысы бойынша Жамбыл облысында 504 бірлік контрафактілік өнім анықталды. Тәркіленген жалған тауарлардың жалпы құны шамамен екі миллион теңгені құрады.
Заңсыз саудаға шығарылған заттардың қатарында Apple, iPhone, AirPods, Puma, Hugo Boss және Splat сынды әлемге әйгілі маркалардың тауар белгілері заңсыз пайдаланылған өнімдер бар.
Тексеру жұмыстарын жүргізуге осы брендтердің ресми өкілдерінен түскен шағымдар негіз болған. Тексеріс қорытындысы бойынша 16 заңбұзушы жауапкершілікке тартылды. Сот шешімімен оларға жалпы сомасы 1,5 миллион теңгеден астам айыппұл салынды.
Айта кетерлігі, өңірде анықталған жалған тауарлардың саны артып келеді. Өткен жылдың дәл осы кезеңінде 403 бірлік контрафактілік өнім тәркіленген болса, биыл бұл көрсеткіш шамамен 25 пайызға өсіп отыр.
